ភ្នំពេញ៖ មន្ទីរប្រឆាំងបទល្មើសគ្រឿងញៀន បំភ្លឺជុំវិញការចុះផ្សាយព័ត៌មានមិនពិតរបស់គណនីបណ្តាញសង្គមឈ្មោះ TNM ដែលបានផ្សព្វផ្សាយលើបណ្ដាញសង្គម កាលពីថ្ងៃទី២ ខែសីហា ឆ្នាំ២០២៣ ស្ដីពីការចុះបង្ក្រាបគ្រឿងញៀននៅម្ដុំសាលារៀនឫស្សីកែវ ខណ្ឌឫស្សីកែវ រាជធានីភ្នំពេញ ដែលចុះផ្សាយថា៖ «ដល់កហើយ សមត្ថកិច្ចបន្ទប់ក៥ ចុចចុចធ្វើប៉ះចំខ្សែអ្នកព័ត៌មានប្រមូលភស្តុតាងបាន»។

កាលពីពេលថ្មីនេះបណ្ដាញសង្គម TNM បានចេញនូវព័ត៌មានមួយដែលបានរៀបរាប់ពីការចាប់មនុស្សរបស់មន្ទីរប្រឆាំងបទល្មើសគ្រឿងញៀនដោយមានមន្ត្រីស្លៀកពាក់ស៊ីវិលចាប់ក្រៀកយុវជន២នាក់ចោទថាពាក់ព័ន្ធគ្រឿងញៀនទៅសួរចម្លើយ ក្នុងព័ត៌មានជាវីដេអូនោះបានបញ្ចេញសំឡេងថតដែលគេថាជាមន្ត្រីគ្រឿងញៀនតេទូរស័ព្ទមកទារលុយគ្រួសាររបស់ជនរងគ្រោះដើម្បីជាថ្នូរដោះលែង។

ក្រុមប្រតិកម្មរហ័សរបស់ មន្ទីរប្រឆាំងបទល្មើសគ្រឿងញៀន នៃអគ្គស្នងការដ្ឋាននគរបាលជាតិ នៅថ្ងៃទី៣ ខែសីហា ឆ្នាំ២០២៣ បំភ្លឺដល់សាធារណៈជនថា នៅថ្ងៃទី៣០ ខែកក្កដា ឆ្នាំ២០២៣ មន្ត្រីរបស់ខ្លួនពិតជាបានចុះឃាត់ខ្លួនយុវជន ២នាក់ពិតមែនដោយសង្ស័យថាជាប់ពាក់ព័ន្ធនឹងបទល្មើសគ្រឿងញៀននៅម្ដុំសាលារៀនឬស្សីកែវ ខណៈក្រុមល្មើសផ្សេងទៀតបានរត់បាត់។

មន្ទីរប្រឆាំងបទល្មើសគ្រឿងញៀនបានឱ្យដឹងទៀតថា ក្រោយពេលសាកសួរឃើញថា យុវជនទាំង ២រូបពិតជាបានប្រើប្រាស់គ្រឿងញៀន ជាពិសេសប្រើប្រាស់បារីអេឡិកត្រូនិក។ សមត្ថកិច្ច បានឃាត់ពន្យល់អប់រំស្ដីពីគ្រោះថ្នាក់នៃការប្រើប្រាស់គ្រឿងញៀន ការប្រើប្រាស់បារីអេឡិកត្រូនិក ដែលយល់ច្រឡំថាមិនខុសច្បាប់ ហើយអង្គភាពបានអញ្ជើញអាណាព្យាបាលមកធានាយកទៅអប់រំ និងយកទៅព្យាបាល តាមសហគមន៍វិញតាមនីតិវិធី មិនមានការជម្រិតទារប្រាក់ដូចការចោទប្រកាន់នោះទេ។

មន្ទីរក៏ច្រាលចោលចំពោះសំឡេងដែលចោទថាជាមន្ត្រីគ្រឿងញៀនហៅទូរស័ព្ទទារលុយគ្រួសារយុវជននោះផងដែរ ដោយថាជាសំឡេងកាត់តដែលមានតាំងពី ៣ឆ្នាំមុនមកម្លេះ។

មន្ទីរប្រឆាំងបទល្មើសគ្រឿងញៀនគូសបញ្ជាក់ថា៖ «ចំពោះរូបភាពនិងសម្លេងកាត់តបញ្ចូលក្នុងការផ្សាយនេះគឺតាំងពីបីឆ្នាំមុនមកម្លេះ មិនពាក់ព័ន្ធដល់កិច្ចប្រតិបត្តិការរបស់មន្ទីរទេ ដែលជាចេតនាទុច្ចរិតរបស់ម្ចាស់ហ្វេសប៊ុកឈ្មោះ TMN ក្នុងបំណងបំភ័ន្តមតិមហាជន បង្ខូចកិត្តិយសរបស់សមត្ថកិច្ចនិងការពារជនល្មើសតែប៉ុណ្ណោះ»។

មន្ទីរប្រឆាំងបទល្មើសគ្រឿងញៀនបានបញ្ជាក់ថានឹងរង់ចាំជួបម្ចាស់គណនីនេះ និងបានថ្លែងអំណរគុណដល់សាធារណជនពីគ្រប់មជ្ឈដ្ឋានដែលតែងតែបានចូលរូមកែលំអ និងសហការក្នុងការបង្ការ បង្ក្រាបបទល្មើសគ្រឿងញៀន ដែលស្របតាមទិសស្លោក «៣កុំ ១រាយការណ៍» ៕